UN FESTIVAL 100% GALEGO

O Festival Revenidas de Vilaxoán, Vilagarcía de Arousa, comezou no 2003 da man dunha asociación de rapaces de Vilaxoán que querían facer algunha actividade cultural no seu pobo. Tras o bo resultado desta pequena iniciativa que acadou a aplauso de gran parte dos veciños e veciñas da vila, decidiuse que para que o festival tivese continuidade facía falta constituír unha asociación. Así xurdiu a Asociación Repichoca, que se fai cargo desta iniciativa cultural ata o ano 2013 colocando As Revenidas e a Vilaxoán no mapa dos mellores festivais do verán e cumprindo XI anos.

cabecera face

Que son As Revenidas?

Nesta edición, a número 11 do festival,  As Revenidas vai bater as marcas en canto a concertos, actividades e programación dende que foi creado. Ao longo da última década, As Revenidas consolídouse como unha das citas máis importantes do panorama musical galego do verán. Un festival dinamizador dunha vila mariñeira que dá oportunidade ao público para coñecer os principais referentes musicais de Galicia.

Pero por suposto, haberá sardiñas salgadas e asadas na grella. As Revenidas, cuia orixe etimolóxica provén das sardiñas, convertéronse en moito máis ca iso; música, actividades e unha sardiñada popular que congrega ao redor do parque a miles de persoas para compartir da festa en familia. Un dos momentos máis agardados do festival é a sardiñada popular, que se leva a cabo o sábado a mediodía. A asociacións da vila organizan o xantar, composto por sardiñas revenidas e empanadas. As Revenidas na actualidade é moito máis ca sardiñada, é xa unha das citas musicais imprescindibles do verán galego.

Revenidas 2014 conta con máis de 29 actuacións musicais, que farán dos días 22, 23 e 24 de agosto unha gran festa da música galega. Ademais de música tamén ten espazo para expresión artísticas como o teatro, o circo, a maxia… Haberá preto de 20 actividades de balde, para todos os públicos, a Gala do Circo en solidariedade co pobo saharaui e a Feira Revenida, onde poder coñecer e mercar produtos cuturais e creativos.

Como novidade para a XI edición, As Revenidas quere facer unha pequena homenaxe ao movemento bravú neste ano 2014 que se cumpre o vinte aniversario do movemento. A posta en valor da música galega actual, prioridade do festival, consolídase este ano coa programación de conferencias, actividades e concertos dos grupos máis significativos do Bravú, que participarán e compartirán cos asistentes a programación deste festival. Ademais porase en valor a música galega, e neste caso a súa historia máis recente, coa difusión de contidos relativos ao movemento.

Os concertos do venres e do sábado serán de pago. Para os días 22 e 23 de agosto os bonos custarán 18 euros en venda anticipada e 22 euros en taquilla. O prezo por día será de 10 euros en venda anticipada e 15 en taquilla. O resto de actividades que terán lugar durante as tardes dos tres días serán de balde, incluídos os concertos do día 24.

O festival ten acondicionadas dúas zonas de acampada, con capacidade para 800 persoas, que dispoñen de baños, duchas e servizo de limpeza. Preto das tendas está a praia e a menos de 15 minutos camiñando atópase o centro de Vilagarcía de Arousa.